तेरणा काठ न्युज
महाराष्ट्राची कुलस्वामिनी तुळजाभवानी देवीच्या शारदीय नवरात्र महोत्सवास तुळजापूर येथे आज गुरूवार आश्विन शुक्ल प्रतिपदा आई तुळजाभवानीची अलंकार महापूजा व घटस्थापनेचा धार्मिक वातावरणात प्रारंभ झाला.श्री तुळजाभवानी मंदिरात पहाटे पारंपारीक पध्दतीने श्री तुळजाभवानी देवीजींची सिंहासनावर प्रतिष्ठापना करण्यात आली.त्यानंतर दुपारी १२ वाजता श्री तुळजाभवानी मंदिर संस्थानचे अध्यक्ष तथा जिल्हाधिकारी डॉ.सचिन ओम्बासे यांच्या हस्ते आज ३ ऑक्टोबर रोजी विधिवत घटस्थापना करण्यात आली. मंत्रोच्चाराने,आई राजा उदो-उदोचा जयघोष आणि पारंपारिक वाद्य संबळाच्या साथीने सर्व पुजाविधी करण्यात आले.
घटकलशाची पारंपरिक पध्दतीने पूजा करून घटकलशांची घटस्थापना देवीजींच्या गाभाऱ्यात करण्यात आली.तसेच खंडोबा मंदिर,यमाईदेवी मंदिर,टोळभैरव आणि आदिमाया आदिशक्ति या मंदिरामध्ये जिल्हाधिकारी डॉ.सचिन ओम्बासे यांच्या हस्ते विधिवत पूजा करून घटस्थापना करण्यात आली.
मंदिर व्यवस्थापन आणि जिल्हा प्रशासनाच्यावतीने भाविकांच्या सोयीसाठी विशेष व्यवस्था करण्यात आली आहे.भाविकांनी दर्शन मंडप सुविधेचा लाभ घ्यावा.शिस्तबध्द पध्दतीने व धार्मिक वातावरण कायम राखून दर्शन घ्यावे.तसेच कुठल्याही प्रकारची अडचण असल्यास तात्काळ नजीकच्या पोलीस स्टेशन अथवा नियंत्रण कक्षाशी संपर्क साधावा. अनेक भाविक वेगवेगळ्या भागातून पायी चालत तुळजापूर येथे येतात त्यांनी वाहतूक मार्गावरुन चालतांना काळजी घ्यावी,असे आवाहन ही जिल्हाधिकारी डॉ.सचिन ओम्बासे यांनी घटस्थापनेनंतर केले.त्यांनी सर्व भाविकांना शारदीय नवरात्र महोत्सवाच्या शुभेच्छा यावेळी दिल्या.
प्रतिवर्षाप्रमाणे या उत्सवासाठी महाराष्ट्रासह तेलंगणा,आंध्रप्रदेश आणि कर्नाटक या राज्यातूनही मोठ्या प्रमाणात भाविक तुळजापूर नगरीत दाखल झाले आहेत.आज हजारो भाविकांनी श्री तुळजाभवानी मातेचे दर्शन घेतले.वेगवेगळ्या गावातूनही युवक भवानी ज्योत घेवून जाण्यासाठी तुळजापूरकडे चालत येतानाचे चित्र दिसत होते.
नवरात्र महोत्सवानिमित्त मंदिर संस्थान,पोलीस प्रशासन,
नगरपालीका,तहसील कार्यालय यांच्यासह आरोग्य,सार्वजनिक बांधकाम, पाणीपुरवठा, एस.टी.महामंडळ आदि विभागांनीही भाविकांच्या सोयीसाठी विविध सुविधा उपलब्ध करुन दिल्या आहेत.भाविकांनी या सुविधांचा लाभ घ्यावा आणि गैरसोय टाळावी,असे आवाहन करण्यात आले आहे.
यावेळी मंदिरातील धार्मिक कार्यक्रमास जिल्हाधिकारी डॉ.सचिन ओम्बासे यांच्यासह श्री तुळजाभवानी मंदिर संस्थानचे विश्वस्त आमदार राणा जगजितसिंह पाटील,महंत तुकोजी बुवा,महंत हमरुजी,वाकोजी बुवा,निवासी उपजिल्हाधिकारी शोभा जाधव,उपजिल्हाधिकारी स्वाती शेंडे, मंदिर संस्थानच्या तहसीलदार तथा व्यवस्थापक (प्रशासन) माया माने, पाळीकर पुजारी मंडळ,उपाध्ये मंडळ,भोपे पुजारी मंडळ, पदाधिकारी,सहायक व्यवस्थापक सिद्धेश्वर इंतुले,अमोल भोसले,विश्वास कदम, उपस्थित होते.याशिवाय भोपे, पुजारी आराधी,गोंधळी व भाविक मोठ्या संख्येने उपस्थित होते.
